UrDuXone.c0m

Muthi’on mein khaak lay kar dost aaye wakt-e-dafan
Zindagi bhar ki muhabbat ka sila dainay lagay. . !

Makeen khush they k jab band they makano’n mein. .
Khulay kawaarr tou taalay parray zabano’n mein. . !

Ab tak na samajh paaye mera shor-e-fugha’n bhi
Tum log tou parh laity ho aankho’n ki zuba’n bhi

Khat is liye shayad mujhy ab tum nahi’n likhtey
Kaghaz pe uter aatey hain saanso’n k nisha’n bhi

Seenay ki ghutan mein kabhi rukti nahi aah’ain
Kamray se nikalney ko machalta hai dhua’n bhi

Shohrat se faqat is liye aata hai mujhy khauf
Mash’hoor na ho jaye mera zakhm-e-neha’n bhi

Is dard k rishtey mein tou yaksaa’n hain shab-o-roz
Jo haal tumhara hai wo aalam hai yahan bhi

Kuch wo bhi dukhi dil liye aaya tha mery paas
Kuch dard bhara tha mera andaz-e-bayaa’n bhi. . !

Utri hai you’n judaiyo’n, tanhaiyo’n mein sham
Jaisy ujaar sheher ki angnaiyo’n mein sham. .

Rangeen qamqamo’n ka sahara liye huay
Sehmi hui hai sheher ki ra’naai’on mein shaam

Kamro’n mein band, hijr k gosha nasheen tery
Kab dhoondtay hain apni pazeerai’on mein sham

Hum sokhta dilo’n ki tumhain kia khabar k hum
Kaisay guzar laity hain tanhai’on mein sham

Ae akhri kiran! Mujhy ghar tak tou chorr de
Ab dhal rahi hai doobti parchaai’on mein shaam

Na-aashna hujoom mein khoye huay they hum
Guzri hai aaj aisi shanasaai’on mein sham. . !

Naadim hoon mein ne koi bhi rahat na di tujhy
Tu jis ka mustahiq tha wo chahat na di tujhy

Apny hi roz-o-shab k jhamelo’n mein gum raha
Jis per tera tha haq wo rafaqat na di tujhy

Tu paas tha tou meri anaa k ghuroor ne
Pathar k aik but ki bhi wuq’at na di tujhy

Dariya tha mein khuloos ka har shakhs k liye
Per boond bhar bhi meine muhbabbat na di tujhy

Kaghaz k qamqam’on ko jalanay k shauq mein
Afsos, koi sham-e-rafaqat na di tujhy

Tu sochta tou ho ga k shayar k piyar ne
Apni kisi ghazal ki bhi surat na di tujhy

Mein kia karu’n k meray both se azaab they
Bus is liye kabhi koi zehmat na di tujhy. . !

Ye Barso’n ka ta’alluq torr dena chahtay hain hum. .
Ab apny aap ko bhi chorr dena chahtay hain hum. .

Kisi dehleez per aankho’n k ye roshan diye rakh kar. .
Zameer-e-subha ko jinjhorr dena chahtay hain hum. .

Jidhar hum ja rahy hain us taraf toota hua pul hai. .
Ye baag’ain is se pehlay morr dena chahtay hain hum. .

Ye naubat kal jo aani hai to sharminda nahi’n hongay. .
Marasam ehtiyaat’ann torr dena chahtay hain hum. .

Ajeeb deewangi hai jis k hum saaye mein baithay hain. .
Issi deewar se sir phorr dena chahtay hain hum. .

Ta’alluq kirchiyo’n ki shakal mein bikhra to hai phir bhi. .
Shikasta aaino’n ko jorr dena chahtay hain hum. . . !

Meri rooh ki haqeeqat mery aansuo’n se pooch!
Mera majlisi tabassum mera tarjumaa’n nahi’n hai. .

Muddat k baad azn-e-tabassum mila magar. .
Wo bhi kuch aisa talkh k aansu nikal parray. .

Mujh se mukhlis tha na waakif mery jazbaat se tha. .
Us ka rishta to faqat apny mafadaat se tha. .

Ab jo bichra hai to kia ro’en judai pe teri. .
Ye andesha tou humain pehli mulaqaat se tha. .

Dil k bujhney ka hawao’n se gila kia karna?
Ye diya naza’a k aalam mein to kal raat se tha. .

Mein kharaabo’n ka makeen aur ta’alluq mera. .
Tery naatay kabhi khuwabo’n k mehal’aat se tha. .

Lab-kushaai pe khula us k sukhan ka iflaas. .
Kitna aarasta wo atlas-o-banaat se tha. . . !

Wo pehli jaisi wehshatain, wo haal hi nahi raha. .
K ab tou shoq-e-rahat-e-wisaal hi nahi raha. .

Tamam hasrat’ain, har ik sawaal dafan kar chukay. .
Hamary paas ab koi sawaal hi nahi raha. .

Talash-e-rizq mein ye sham iss tarha guzar gaee. .
Koi hai apna muntazir, Khayaal hi nahi raha. .

In aatay jaatay roz-o-shab ki gardisho’n ko dekh kar. .
Kisi kay hijr ka koi malaal hi nahi raha. .

Hamara kia banay ga kuch na kuch tou iss pe sochtay. .
Magar kabhi humain ghum-e-maal hi nahi raha. .

Tumharay khaal-o-khad pe ik kitaab likh rahy thy hum. .
Magar tumhara husn be-misaal hi nahi raha. .

Sanwaarta, Nikhaarta mein kaisay apny aap ko. .
Tumharay baad apna kuch khayaal hi nahi raha. .

Zara si baat se dilo’n mein itna farq aa gaya. .
Ta’alluqaat ka tou phir sawaal hi nahi raha. .!